ખાર ના લઇને ફરો._મુહમ્મદઅલી’વફા’

ખાર ના લઇને ફરો._મુહમ્મદઅલી’વફા’

 

 

ખંડહરમાં બાઝી ગયેલા તાર ના લઇને ફરો.

જર્જરિત જૂના બધા ઇકરાર ના લઇને ફરો.

 

દિલ પણ કદી દીધું હશે,લીધું હશે એ પણ કબૂલ,

વર્ષો થયાં એ પ્યાર ને એ પ્યાર ના લઇને ફરો.

 

ફૂલો ગયાં, સૌ હાથથી, એ છે મુકદ્દરની રમત,

ચુંભી ગયો ‘તો ખાર જે એ ખાર ના લઇને ફરો.

 

ખૂલી જશે  એ એક દિન  આ ગાંઠડી  વર્ષો તણી,

હોવા પણાંનો હર ઘડી આ ભાર ના લઇને ફરો.

 

આવી ગયાં છે ઉપકરણ નિત નિત નવા  બાઝારમાં

ખંડિત થયેલી  આ હવે તલવાર ના લઇને ફરો.

 

કંઇ કેટલી મહેફિલ મહીં  આ જિંદગી છે વહેંચવી

આ જિંદગીમાં દિન ફકત બે ચાર ના લઇને ફરો.

 

માંગે  હવે તો દર્દ પણ  થોડી વધુ પીડા અહીં,

એ પ્રેમનો બીમાર છે ઉપચાર ના લઇને ફરો.

 

એ આવવાનું એક દિન  દસ્તક જરા દીધા વગર,

એ મોતની સામે કદી પડકાર ના લઇને ફરો.

 

આ તો સમય નું ઉંટ છે એને  વિસામો કયાં મળે,

ઓ મુસાફર રણનો બધો વિસ્તાર ના લઇને ફરો.

 

એતો સમાયો છે સદા એકેક કણ ને તારમાં

શોધો‘વફા’ હૈયા મહીં  આકાર ના લઇને ફરો.