મળતો નથી _’વફા’

 

મળતો નથી _ મોહંમદઅલી ‘વફા’

તૂટી ગયેલા તાર ને લય પણ કદી મળતો નથી.
આકાશ થી સાચો સિતારો કોઇ દિન ખરતો નથી.

ફરતો રહે બદલી દિશા એ આગનો ડુંગર બની,
ઢળતી રહે છે ચાંદની સૂરજ કદી ઢળતો નથી.

ભીંતો તણા પોલાણમાં છાનું રડે છે મૌન પણ,
વરસો થયાં આ ઘર મહી કો માનવી જડતો નથી.

બે ઇંટના વચ્ચે રહી ઊભી કરી દીવાલ મેં,
આ થાંભલા નો રંગ જુઓ એ મને ગણતો નથી.

તૂટી ગયાં છે કેટલાં સપના અમારા દિલ તણાં
તો પણ‘વફા’ધીરજ જુઓ હું આહ પણ ભરતો નથી.

(4સપ્ટે.2007)