સ્પર્શ તણો  તણખો _મુહમ્મદઅલી‘વફા‘

 

મળતા રહો બસ હવે હસ્યા વગર

પાછા ફરો એક શબ્દ  કહ્યા વગર

 

વર્ષો તણો બોજ લઇ  ફરતા રહો

ખાડો કબરનો ભરો જીવ્યા વગર.

 

કાગળ અમારો અવતરે જો કદી

ફાડી દિયો એ તમે વાંચ્યા વગર

 

પાણી તણું એક પણ ટીપું નથી

ડૂબી ગયા  ક્યાં તમે તર્યા વગર

 

ઇચ્છા રહી  પામવાને સ્વર્ગની

પહોંચી શકાશે નહીં મર્યા વગર

 

કઇ રીતના મ્હોરશે  એ ફૂલડાં

બીજો જરા પ્રેમના વાવ્યા વગર

 

સ્પર્શ તણો  તણખો ‘વફા’ કયાં ઊગશે,

આ હાથને હાથમાં ધર્યા વગર