સાચવી લેજે_ મુહમ્મદઅલી‘વફા‘

 

કદી તૂટી નહીં જાએ  રસમ ને સાચવી લેજે.

હવે જે ખાઇ લીધી છે કસમ ને સાચવી લેજે

 

ખુલાસાની જરૂરત પણ હવે રહેતી નથી દિલબર

બધાનાં  દિલ મહીં જે છે ભરમ ને સાચવી લેજે

 

પહોંચવું હોય જો એની સમીપ, શરત એ રહી છે ત્યાં

જિવનને ને સાચવી લેજે કરમ ને સાચવી લેજે

 

બધા સર્જન મહીં દીધા તને ઉત્તમ બધા દરજા

ઠરી જાશે ખરે સાચા ,રહમ ને સાચવી લેજે

 

ઘણા રસ્તા ભલે દોરી જતા  ખોટા સુરાલયમાં

તુ મન ને સાચવી લેજે કદમ ને સાચવી લેજે

 

બને નારાજ થઇ જાયે બધા મિત્રો કદરદાનો

જરા પરવા નહીં કરતો સનમ ને સાચવી લેજે

 

ફકત એકજ  ‘વફા‘ તુજને   અહીંયા એ મળેલું છે

પછી મળશે નહીં તુજને જનમ ને સાચવી લેજે