વતનની  લાજ રાખી છે ***મુહમ્મદઅલી’વફા’

 

બની પાપણ આ વાળોએ નયનની લાજ રાખી છે.

મને સૌ કંટકો કહે છે ચમનની લાજ રાખી છે.

 

જશે સૂરજ  સમય સર આથમી ને આ ચાંદ વર રાજા

ભલા મેં તારકો  થઇને ગગનની લાજ રાખી છે.

 

મને બારાખડી કહીને  નકામી સે’જ ના ગણશો.

બની શબ્દો નો ગુલદસ્તો કવનની લાજ રાખી છે.

 

અમોને આમ ભૂલાવી  તમે શકતા નથી સહચર,

 શહીદ અબ્દુલ હમીદ થઇને વતનની  લાજ રાખી છે.

 

અમારી રાત તેં રોશન કરી  છે મીણ બત્તી થઇ,

 અમે જલતા પતંગા થઇ જલનની લાજ રાખી છે.

 

 

અમે નમતા નથી  કો અન્યને હે વાહિદ ખુદા વંદા,

 ખુદા સજદો   કરી તુજને   નમનની લાજ રાખી છે.

 

અમારા સમ ‘વફા’ તમને, ન કો સાકી કદી મળશે

બધાંયે જામ  ઉભરાવી ઇજનની લાજ રાખી છે.